一個人無夢想,同條咸魚有咩分別?!!

[一個人無夢想,同條咸魚有咩分別??]
星爺既名句,唔止深入人心,最近仲成為中學生奉為古語,
同[人生得意需盡歡,莫使金樽空對月]睇齊,可以作引經據典之用,
我實在替一眾中文老師不值,多年既教學,都比不上星爺既電影,同一句對白咁植入學生既腦中,
教師們睇黎要向星爺好好學習,嘿嘿......;
但其實當年我地做學生都一樣咁學習,係會記得古人既名句,即使到而家都仲要記得多少,至少,唔會腦殘到拎電影經典對白當古話咁引用囉。
照咁睇,其實我地根本係勤力既好學生,仲要係無腦殘既。

可能本人既花名既關係,一直都對哩句[古語]有多少敏感,聽到就總覺得係揶揄*緊我(註*即係[串]);不過,哩句野確實係有意思,而我又確係無咩夢想,最多係識講而唔識做,當朋友們正向夢想理想一步步進發,一步步將之實現既時候,我仍然停滯不前,問心,我係有自卑,有慚愧。
相比以前,我更加唔去計劃將來;以前係唔識,而家係唔想,因為我唔相信將來,一切只看眼前,只顧當下,有點[今朝有酒今朝醉]既心態,對人對事都採取即興既態度去處理,咁當然係會先分輕重既;
哩種態度,好聽叫隨心隨意,活在當下,唔好聽既就係思想消極,放棄自己,唔識諗唔上進無大志....等等,大部分既人係會以後者去形容,我當然聽過不少人咁形容我,批評我。
大家不約而同地對我講,人生仲有好長,要積極面對,唔好放棄對夢想既追求,將來仲有好多可能,生命長短無人知,點解要咁早放棄?長或短都可以追求自己所想,趁仲年青,應該好好發揮,學習更多,嘗試更多.......等;我大致上都識背果幾句成日出現既內容,聽得耳朵麻木,有多少反感,我只係想順我自己既心意生活,唔想諗咁多,追趕咁多,做個平凡打工仔,月月有糧出,夠食夠使就算,
點解唔可以?點解我一定要計劃將來?點解咁肯定會有將來哩回事?
我知,咁講會令部分關心我既人好失望好不滿,但哩個係事實。
坦白講,夢想唔係無,只係唔係咁簡單可以實現,亦唔到我控制,唔...其實...唔可以話係夢想,而係一個約定;我記得,當日於媽咪既床邊,我摸住佢臉龐,悲痛而激動地要將所有我想講既說話講哂俾佢聽,俾佢知,我記得,我同媽咪講,好幸運可以成為佢個女兒,得到佢盡心盡力既照顧,以及毫無保留既愛,令我一直好幸福,今世佢辛苦了,下一世就調轉,由我當佢媽咪,佢做我女兒,俾我好好照顧返佢,盡我所能去愛護佢,等我回饋返所有既幸福俾佢;那時,媽咪已經回應唔到我,但我知道佢一定聽到,一定會答應我,我叫佢一定要記得,我地下世要再做母女,所以,算係跟佢約定左。

因為哩個約定,我開始諗:[我點先會做到媽媽,生到個女呢?],再諗:[我會唔會有機會做媽媽先?],再諗落去:[有邊個會同我生小朋友先?],再諗埋落去:[我會唔會有機會結婚先?],再諗諗下又諗到:[有無個係佢愛我我又愛佢既男人會同我結婚先?],最後諗到:[我有咩條件去愛人同要人愛我先?],
唔,睇黎搵到問題既源頭。
或者我係自私,竟然因為要跟媽咪再見面,而想去結婚生小朋友,我唔否認;不過,更大既原因係我想將媽咪灌輸俾我既一套正確價值觀延續落去,等我既下一代可以承傳落去,亦希望可以替屋企帶來新既希望同快樂,一個家多一個新成員,尤其小朋友,係最開心既事,媽咪講過一句疑似係外婆外公講既古老話:[屋企張飯檯四隻腳鑲金都唔笑,多個小朋友就哈哈笑],意思即係屋企幾富貴,都唔不及一個小朋友可以帶來咁多歡樂,當年細細佬出世,家中各人都好高興,因為家族中好耐無新生命誕生,即時多左好多話題同歡樂,所以媽咪就咁樣形容。

返回問題既源頭,先要令自己變得有值得人愛既條件,於是,我研究買餸煮飯煲湯整甜品;我學習處理更多家務;我努力維繫家人既關係同家中既氣氛;我變得更主動關心身邊我重視既人;我嘗試搵最適合自己既妝容衣著,我不斷提醒自己不再年青,思想要更成熟細密;(句句都[我咩咩咩..我點點點...],點解咁似689條走狗既?!!)。
似乎,有樣重要野漏左,就係----------減肥同保養身體;噢!明顯係我最想逃避既題目,但又係最急切既題目,係係,係要認真去減肥,咁我都有左個決定,就係嘗試搵人幫下手,希望真正幫助到,又快見效。至於保養身體,我的確係好懶好唔緊張,成日唔理,同樣要下一下個決心,積極跟進改善,否則,永遠都兌現唔到個約定。

最後想講,其實,咸魚未必無夢想,只係在乎個夢想大定小,難唔難去實現到啫。

真的注定了嗎?

如果問我信唔信人既命運係早有注定,
我相信生死一定係,該死唔使病,
而緣份,都係一半一半,所謂人夾人緣,都有一定程度既準確性,
對於愛情方面既緣份,有時真係唔到我唔信,
因為總有人係特別吸引,即使佢唔係咩好條件。

今日差唔多中午12:00,仲懶緊床既時候,收到你既電話,
我:[喂?]
你:[喂~]
[做咩事?]
[你今日有咩做?]
[ER...無野做.]
[唔...]
[你想點?..]
[咁去睇戲?]
[哦...睇咩?]
[名瞞戇族]
[ER...會唔會好無聊架?]
[唔會既...]
[OK,睇幾點?]
[3:45]
[下...我要去買餸既時間喎.....]
[咁你而家去買,買完剛好去睇戲,睇完返屋企煮餸,口岩口岩好!]
[嘿嘿...你都幫我諗好哂喎...]
[梗係啦!!呀係,咁約2:00去食野啦!]
[下?2:00...好趕喎...ER...是旦啦...]
[唔,咁就咁啦]
[哦..拜拜]
[拜拜]
就係咁,我就要爬起身做家務。
不過,一個鐘頭後,你又打黎,話唔去食晏,俾多D時間我買餸,3:30地鐵站等。

原來係得三個人去睇,我,你,S;
我上到戲院前打俾你地問飲咩,順手經7仔買埋,
你話要錫紙袋包裝既利賓納,我話好似無,你話咁我飲咩就跟我飲咩啦;
其實,我都唔知自己想飲咩;
上到去,最遲係我,你地已經排緊隊買飛,仲問我拎會員卡,
我企開一邊等你地,之後個職員話要換新卡,用電腦搵到卡主資料,
職員見到係女仔名,但望見你,一臉疑惑咁問邊個係卡主,
我上前話係我,佢就俾張新卡我喇,S同我就笑左,話人地見個名同性別係女仔,但真人係個男人,好驚嚇囉!!你話有咩問題,女仔名唔可以係男仔咩?!
新卡背面印左我個名,積分等等,我話咁樣如果跌左俾人執到咪知道哂裡而既資料囉,仲有埋名...
你好奇咁問左句:[你唔鐘意自己個名咩?],我呆一呆答你:[唔係呀],[咁你怕咩俾人知?],我無言。
開場前,你話買唔買爆谷,我同S都話唔買都得,你又話想食雪糕,我話雪糕唔係睇戲食,唔好買啦,你話咁睇完戲先食囉。

套戲實在係有D無聊,不過就好爆笑!!粗口多D爆,仲有好多有味笑話同搞笑成人情節,男女主角都做得好自然,我地笑足全場!!我地睇完,你一個行去某方向,我地問你唔係另一邊咩?你:[去食雪糕嘛。]哦...OKOK。
我同S坐低左,等你去買;雪糕到,我地準備好錢要俾返你,你唔收,話你請,我地話唔好,你話唔係要施捨喎,我話總之就要收錢啦!
我同S講緊某某既8掛野,你邊聽邊食雪糕,聽到中段就話點解我地講D野咁無聊,我話邊有咁多有聊野講啫,
S叫你咪扮野啦,你都係8掛啦;之後你聽到某某既行為,就問;[女人唔係會揀D自覺佢好叻,好崇拜,仰慕既男人拍拖架咩?]我同S話某某唔係囉,你再問:[咁男人都係要搵D祟拜自己既女人拍拖架?]我同S再講多次某某絕對唔係囉;
你話咁唔可以起埋一齊架喎,實分開;

行返屋企時,我又開始搵野講;
我:[你今日係休息?],
你:[唔...今朝先收工],
[哦...我仲以為你一陣10:00又要返工果種]
[今晚唔使],
[係咪好難放正星期日?]
[係,好少可]
[哦哦...]
[你地下星期去哈佬喂]
[嗯嗯,你係咪都係黎唔到?]
[唔得啦,好難有得放到星期日]
[唔...係呀...咁希望到時臨時又叫你放假,咁你就可以一齊去!]
你點下頭無出聲,我繼續自說自話;
[你可以好好O係屋企訓返覺,休息下],
[下...都無分別喎],
[咁唔使趕返工,唔使無得訓,唔使O係公司或是船度訓喎,咁仲唔好咩?],
[我而家訓得好少,幾個就醒,醒左就訓唔著]
[咁夠唔夠精神做野?]
[夠呀,無問題,仲多出好多時間做野]
[我都想好似你咁,訓少D都得]
[即係一日24小時,我訓4個鐘就夠,咁就有22小時去做野]
[哈哈....咁真係賺左喎!]
[不過,我都係覺得唔夠時間用]
[下?你仲有咩要做?]
[我報左考車,11月26號就考]
[哦...原來係咁,你...無時間溫書?]
[筆試我PASS左喇,係我無時間學車,一次都未搵師傅練]
[下?咁得返個幾月喳喎...]
[上網d人話至少學20個鐘先PASS,我邊有時間]
[咁...咁點算?]
[我諗住落機鋪玩返幾鋪]
[哈哈哈....你去學揸髮夾灣咩?!]
[係架.....不過我都係決定上YouTube學!]
[哈哈......點得架??唔好搞笑啦....]
[真係架,我而家學左一堂喇!]
[咁...咁你一定PASS,我恭喜定你先呀下]我望住佢邊笑邊扮哂誠懇咁講,
[唔係呢,我覺得真係得架!]
[係係...咁你俾心機學啦...]
[不過,上你車之前我要諗定D身後事先]我諗左一陣再講;
[使唔使呀,唔使驚啦]你抗議;
[咁我等你自己揸多幾次無事,我先坐你車]
[唔唔....到時可以載你地出去]
[載我地去邊?]
[下,可以載你地出去食野囉!]
[哦...咁都好喎!不過,你未揸得掂之前,就只係載我地O係東涌範圍好喇,最多去到機場,唔好出公路]
[唏!!點會呀!邊有咁差架]
[講下笑啫.....不過學車都好,可以多樣技能,多個嗜好]
[下,嗜好?我只係想多樣技能]
[唔...又或者可以溝女]
[徙氣!用車去溝女最無謂]
[啲女仔睇車之餘都睇人既,所以係無咩用]
[係囉......總之就無用架啦]
[咁...我都係想令學車哩件事多D用途,咁好似學得抵D嘛]
[....低能...]
我地已經行到大堂,我問你係咪返去就開飯,你話係,我話你就好,我仲要返去煮;
講完你部電梯就到,咁就我地互相講拜拜。

頂,點解仲要咁記得?都唔知記黎做咩!!!
可能係感覺太熟悉,同時變得深刻,
面對住你,果份親切好自然令我覺得好自在,好無壓力,
當然,我知咁係唔應該,仲好戅居,不過又控制唔到自己。
如果緣份就係注定只會對一個人有感覺,
咁我對你算唔算?

感情線下

好耐無深夜黎寫下字打下文扮下文藝青年,
一來無心情,二來無心情,三來.....好眼訓-_-
而今晚就有啲野想寫下......

身邊既同學朋友同事,唔係結婚就係準備做爸爸媽媽,或者已經做左爸爸媽媽,
可能自己過左生日,又距離30近左一步,加上啲媽咪級既朋友成日問我拍拖未,於是特別敏感,
特別覺得自己係條無人要既可憐蟲!唉,容乜易就30,到時更加無人要,喂,我一次拖都未拍過,我唔係打算一直獨身終身不嫁架!我都想有自己既家庭架!!唔係要我咁就一世啩?!!
老實講,我話唔心急唔想呢就呃人既,我都想大大聲同人講:[我都有拖拍]或者[我都嫁得出啦!],只係自己知自己事,[緣份永遠要避開我,今天我實在願講和],人生有好多野真係唔係強求得到,係你既就係你既,唔係你就點都唔輪到你,哩點我最清楚,自從媽媽離開後,我更相信哩個道理。
咁代表左咩?代表我唔想再去爭取,唔再相信自己會得到幸福,因為,得唔得到都唔係我可以去控制,係上天決定,係命運安排,係整定;結果呢?我可以更肯定自己係會孤獨終老。
當然,我無積極增值自己,都係抵死既,所以.....又唔能夠怪緣份避開我,我係男既,都避開啦,咪玩啦!

不過人係矛盾生物,尤其係女人,所以另一邊廂既我,又有另一個諗法。

仍然係因為媽媽既離開,除左令我體會到[整定]哩單野之外,亦啟發左我對生命無常,人生苦短既體會;如果有野想做,唔會影響到其他人,而自己又開心既,點解唔去做?如果唔做, 成件事只係得個[諗]字,咁有咩意思?能力上可以滿足到自己既欲望,何樂而不為?連我自己都唔俾自己開心下,唔去滿足自己,仲有邊個會去滿足我?去達成我既想法?係囉,就係無囉!
所以,同時間我變得想做就做,唔多理後果,只求自己開心;當然我都會先做一下評估,衡量一下後果係點,我頂唔項得住;於是,我就o係唔知係情人節定元宵節,親手造左張卡同朱古力向一個男仔示愛,對方完全被我嚇呆;而我送之前緊張,送出後就一身鬆哂地當無事發生咁,因為我只係純粹想示愛,唔係要求對方接受我,所以無咩負擔。結果,真係無事發生一樣,因為我被婉拒左。
唉,係有多少唔開心,不過轉頭我已經若無其事同對方相處,內心因為果份好想表達既衝動被滿足左而感到好舒暢。
回頭再諗真下,其實我咁樣做都幾自私,想做就去做,如果遇到個唔成熟既人,一定會搞到好麻煩。
好在,遇上既都係思想成熟既人,唔係小朋友。

活在感情線下既日子,雖然悶D,不過都係要生活既。

其實我懂的

近來多左機會同朋友傾計,
女仔走埋一齊,
自然講到情情塔塔既話題,
聽下講下,八卦之餘,仲明白多野。

我知道,佢地知道好多我唔知道既事,
所以,有時聽到啲真心話,或者既小[咪咪],
我都唔會感到太意外;
不過,有啲事,其實唔講我都知,只係唔太想面對,
就好似佢地話某某其實係個好直接既人,
鐘意唔鐘意都會即刻出聲,
所以,既然表現得咁明顯,叫我都係唔好再諗喇。

我知我知我知...我當然知,
識左咁多年雖然未至於好了解,但都知某某係點樣既一個人,
所以,大家唔使一而再,再而三地同我講,
有時候,會令我感到好自卑,
自己好似個白痴一樣,
人人都知我做緊傻仔,
好心既就提醒我,其他既就掩住嘴笑,
唉。

放心,我努力搵新目標,接近搵到,
所以,唔使再提醒我.

仍然是這樣

仍然是這樣:

每當我感到很大壓力,遇上很多煩惱,

滿腦子都是問號,很無助的時候,

除了想起媽媽外,

就是想起他;

或者我現在說我會令人卻步,

但我想做人坦白一點,

至少對自己要坦白;

想起他的原因,

不是他能幫助解決問題,煩惱,

也不是能開解我什麼,

更不是他的嘴巴有多甜多滑令我聽得很順耳,

相反,

還很大機會被他揶揄,被他教訓,

得到一兩句冷言冷語;

但不知為什麼,

我就是想見他;

當然,我們不會時常見面,

也沒有什麼機會談正經事和心事,

絕大部分時間都是大夥兒在胡扯嬉笑,

所以,我也不明白一個不常見,不懂安慰別人的人,

怎麼我會在煩惱時想見他??

我原以為自己已經放下了對他的感覺,

因為他已不再像當初吸引,

不過,就是在最近煩惱天天都多的日子,

仍舊會想起他,想見他;

老實說,

我不時也會想起上年那個時候,他一下班就打給我的那通電話,和他叮囑友好要好好照顧我...那溫馨和窩心的感覺,很深刻。

就是他一向冷漠的外表,使我很珍惜他難得的關心;
有時當我很煩惱的時候,便不知不覺想起這些事情,
然後便微笑起來,就像是一種安慰。

其實我感覺自己很可憐,要從這些回憶中去找安慰,
可能因為他給了我很多的第一次,
所以,就是忘不了。

一個癲哂既晚上

雖然時間過左咁耐,

但我諗,我真係只對你有感覺。

大前晚(39/3),倩兒生日,約埋去唱K慶祝,

可能好耐無一班人去唱,我個人黎講係比較興奮,
放左工就急急腳趕上機鐵出去,

當然,你既出現我都幾意外,心諗:細粒出手,真係個個都到;
我係最遲到既人,坐低倩兒細粒就叫我嗌野食,,我其實就唔多肚餓,見到咪就即刻掛住揀歌,
好想快D唱到歌,你又叫我嗌左野食先,咁我就擰住張meuns開始揀野食,
佢就幫我CALL左職員拎餐具,個職員黎到,問放邊,佢望下我話:[哩位小姐既.],個職員就放係我面前,我聽到佢咁講,忽然覺得佢幾gentleman!俾我只係叫個職員:[放低得喇.]咁,佢稱呼我"小姐"喎!難得難得。
我食緊野時,就已經見到檯上兩支綠茶,一支black label,同埋4個骰盅,嘩!又會玩到癲左,飲到傻左!
希望一陣唔好輸得太勁,我唔想又飲到嘔死左...
可能好耐無唱k,我都唔知點咩歌,一黎只係揀左sammi既歌,當開聲啦;倩兒似乎志不在唱歌,係咁叫我地玩骰盎,猜枚,我就食完先玩,睇住佢地玩先;佢地玩大話骰,我都識既,所以加埋把口,點知俾倩兒話咪咁多野講,快d落場玩!!
好啦,食飽就落埸!!!由於有細粒,所以我好少輸,點解?因為佢成日忍唔住要開人地,結果中哂招,佢同你又水溝油咁,係要鬥嘴,唔放過對方,於是細粒成日被跣中!哈哈!!倩兒都輸架,不過佢生日,所以左咀英勇地話左今晚佢幫倩兒頂哂d酒!!結果,佢無份玩,只係唱歌,但就好快飲到面都紅哂!!
可能你溝得比較輕手,我咁唔飲得,飲左幾杯都無事,不過都口岩既,仲有成晚咁快溝哂d酒點夠玩!!
大話骰玩左輪,倩兒教玩新野,轉到用手玩,點玩?就係一個伸隻右手出黎貼埋一齊,做一個[like]既手勢,不過就收埋隻手指公先,咁另一隻手就要聽玩家既指示做姿態,主要都係要掂住隔離果個人既身體;咁之後就逐個嗌數目,各自豎起手指公,叫中豎起手指公既數見,就要拍落去,拍最遲既就輸。倩兒一開始就話要掂住隔離既下巴,而我隔離既係你,即是你掂我,我掂你,我摸落你下巴就俾你d鬚根拮,我話你做唔咩剃乾淨!!佢無理我,伸手掂落我下巴,OMG!我忘記左哩個地方係我既死穴,超敏感!!佢掂到我時,我真係有怕醜囉!救命!!唉...原來我仍然咁敏感><
咁玩落去,人人既指示都唔同,攣毛同謝健最客氣,只係需要手落後面,倩兒就最唔客氣,PATPAT同心口都夠膽講!!我同細粒都大嗌唔好,搞笑地連佢地三個男仔都話唔好,結果改左放係隔離條腰,咁當然,你就係搭左落我條腰度,果下,真心真係幾開心囉。
到我出指示,我揀耳仔,本來簡單係伸手就可以掂到隔離既耳仔,不過倩兒要增加難度,要掂左邊既耳仔,咁即是隻手要撓過個頭,從後去掂住隔離果個人既左耳,哈哈,我地被逼要CLOSE D,
我就要彎低D等你可以掂到我,而我就好輕易可以掂到攣毛既左耳!!
我覺得個GAME其實都係想增加大家身體接觸既機會!!

玩完一輪,係時候唱下歌,
我發現飲左酒係唱得差左,可能喉嚨既肌肉放鬆左;連唱左四首,分別係[你是答案][最重要的決定][熱戀之後]同[一瞬間],當我唱完[最重要的決定],細粒同我講,我有無打算參加歌唱比賽,我話無喎,做咩咁問,佢話我唱得真係唔差,好穩定,係可以參賽既水準,我聽到只係識哈哈笑,然後繼續唱;
當我唱到[一瞬間],不自覺望向你,因為我覺得首歌其實係講緊我對你既態度,而你都係望緊個mon,應該係聽緊我唱啩;可能因為你在場,我唱得好落力,當然,保持水準!

骰盅真係玩法無限多,好在我無飲醉,唔係輸好多,不過細粒就唔掂,係咁輸,於是係咁飲,我都忍唔住幫佢飲左幾杯;由於已經HIGH爆左,D懲罰開始好癲;
本來輸左飲啖酒,之後就發展到女仔彈BRA帶,男仔彈底褲邊!!真係好正囉......我地三個女仔都好大方既,彈就彈啦!!反而謝健要擰轉面,背住我地黎彈;良友就無加入,因為佢話唔想自己被彈,所以唔彈人喎;不過玩多幾次,就改做打PATPAT,哈,哩個仲正!!大家出盡力咁去打,打到[啪啪]聲!!
打既就爽,被打既就痛,仲要飲埋酒,嘩.......真係不得了!!
由於倩兒係壽星女,左咀早就話佢輸左就幫佢頂,於是除左飲酒,就係捱打!佢唱啪下歌俾我地叫佢起身打PATPAT,佢真係O哂咀!!唯有硬食!!

不知不覺,已經兩點幾,而細粒同倩兒兩個已經訓低哂,一個就醉,一個就眼訓,即係話,係時間要閃人;我地分別扶住兩位小姐,我扶細粒,左咀良友就陪住倩兒,慢慢行去搭泥鯭的。
好耐無咁夜o係旺角,但原來比以前多人左好多,我地經過一間通宵既點心鋪頭,
我忍唔住話不如飲個放茶食點心啦~~攣毛話無問題,叫醒醉左果兩個先啦!!哈哈.....我話應該無人陪我癲。

返到屋企,嘩!差唔多四點!!

朋友,就這樣已足夠

已經不只一次,

被說教要認識多些朋友,多些不同層面的朋友,

藉此擴闊生活圈子,對個人的見識和發展也有幫助,

我對此沒有異議,

擴闊社交圈是可以,

但叫我減少跟現時的朋友混下去,

則絕對不可。

我的朋友,

不是李首富的兒子,不是什麼富二代,

不是什麼律師醫生會計師金融才俊,

不是樣子甜美身材一流模特兒,

只是很平凡的人,

他們是腳踏實地的打工仔,

是善良,真誠的人,

我就是喜歡這樣的他們,

因為,沒有競爭,沒有比較,沒有機心,

相處沒什麼壓力;

大家聚在一起,

吃喝玩樂可以,

安靜談天可以,

認真分析可以,

兩三個人可以,

一大班也可以,

只要時間許可,

便能無事常相見;

經歷巨變,人不可能沒改變,

也不可能再盲目,是會清醒一點的,

陪我一路走過最悲最傷最痛的日子的人,

我也會視之為好友,亦心中有數

沒有他們的陪伴,鼓勵,開解,邀請參加活動等,

我可能仍是終日淚流滿面,再站不起來的那個我,

而他們心中有我,願意關心我,

就已經值得交朋友了,

自問沒有什麼了不起,也沒有什麼[著數]可以分給別人,

但在我最低潮最谷底時,卻有這些朋友來關顧我,

心裡真的[暖得像個溫暖既太陽]。

不管將來,只問現在,

對我來說,

只想彼此健康快樂,努力生活,積極進步,互相支持,

重要緊記無事常相見,

朋友,就這樣己足夠。