最近其實有好多感受,而且係幾點嘅感受,
所以,都想盡量記一下,簡單地寫低;
臨迎年尾,工作愈來愈忙,愈忙就愈多野做,總之沒完沒了;
人手唔夠,新同事換完一個又一個,無幾個做得長,每次教完,做一排就唔做,可能大家都唔鐘意數錢啩,
於是,工作始終都好難維持到正常進度,而經理自然成日打黎追,哩樣幾時交得?果樣做到幾多號?,,,等等;
我已經答到麻木,因為只得一對手,要計嘅銀碼就愈來愈大,錢銀數量愈來愈多,如果遇上假期紅日,咁仲慘;
不過算啦,我忍耐到嘅。
早幾日,同朋友傾開女人仔嘅話題,大家都成30歲,話題好自然就講到拍拖結婚生仔哩個題目;
本來係講緊佢嘅感情煩惱,佢想結婚,但對現任男友,對自己嘅信心都不足,我只可以盡量客觀地分析,俾下意見,多方面地問佢一啲佢自己未必諗過,或者一直逃避嘅問題/可能,希望佢可以全面地去諗清楚;
傾到後段,佢問我:[你而家有無鍾意嘅人?],我第一秒有點被嚇到,因為好耐無人問我哩個問題,到第五秒,我就答佢:[無],佢未表示懷疑,要問我:[其實你係咪怕左?],我答:[都係],佢再問:[點解?],我話...我都唔知道,可能係我唔相信愛情唔會無緣無故發生,唔相信有人會無目的地去愛一個人,愛係有條件嘅;佢話唔係咁,只係我未遇到先會咁諗,當我遇到哩個人時,自然就會明白,我笑左幾下:[咁好可惜我真係未遇到]。
回家後,臨睡前,我諗左陣,原來自己真係好耐無去鍾意過一個人,即使似有好感,好快都會睇清楚,只係[晏眼嬌],轉眼經已忘掉;但我知道[鍾意]哩樣野係咩一回事,因為我都有一次經驗...係單戀嘅經驗,然而往後再無人可以俾到我同樣嘅強烈感覺。
不過,我都覺得自己用利益衡量愛情嘅諗法好唔應該,亦好可怕,咁樣落去,我真係唔可能會遇到真正嘅愛情,做硬老姑婆。
愛情和婚姻, 某程度上係咪"各取所需"?我唔知點答。
前日,老豆話我知,佢果位因為中風而昏迷兩年幾嘅中學同學,過左身;原本一直住緊專人監察嘅醫院,情況保持穩定,而且對外界有反應,家人,朋友同佢講野,佢手指可以微微郁動一下,眼睛都可以微微地眨一下,哩個已經係好大嘅進步,,老豆不時都會去探望佢,喺佢耳邊講下野,老豆話都睇到怇係有反應,證明佢係聽到,接收到外界訊息,只係佢個身體真係郁唔到,講唔到,只係用輕微嘅動作去回應;當一切都如常之時,佢卻要轉到條件較差.無專人監察嘅院舍,住左不足一個月,就過左身,院方表示佢係因為呼吸受阻而死亡,老豆話應該係因為無人睇住而失救,我聽完,個心都好難受,因為哩位姨姨我自小就認識,只係唔多機會見面;
我同老豆講,姨姨個老公實好傷心,好自責幫佢轉院,令佢得唔到最好嘅醫療而過身,而且姨姨終於可以進步到對外界有反應,佢老公一定會想同佢講多啲野,因為佢會係聽得到,哩兩年多嘅付出,終見成果;好可惜,哩個時候佢又走左,佢老公會有幾難受,我地都可以想像到...老豆都擰擰頭,話早兩個星期去睇佢,仲好好地,一切指數正常,情況穩定,點知一轉院就出事,都知道哩間醫院條件係差,但原本嘅醫院床位緊張,已多次叫家人搵其他院舍俾姨姨住,以騰出床位;
我睇到老豆都係唔開心,相識幾十年嘅朋友又走多一個;而我,就恍惚感受到姨姨同佢老公兩個人嘅感受;
要是姨姨意識係清醒,係有感受嘅,佢唔會想喺哩個時候離開,因為佢終於可以俾到反應佢老公,家人,朋友,表達到佢嘅反應;而佢老公,當然同樣唔想哩個時候失去佢,因為,佢地兩個人終於可以再次溝通到,交流到,唔使再自己同自己講野,而係真係同緊太太傾計。
諗到哩度,我不自覺眼濕濕...可能而家嘅我,好能夠體會到當有親人離世嘅傷痛,所以好易代入到。
我諗,如果姨姨可以講到野,相信佢一定最想同佢老公講:[多謝你,辛苦你喇!]。
上天,永遠都要咁殘忍,拆散大好家庭。
或者,愛情和婚姻嘅緣起同目的,人人都唔一樣。
覺得我係鬥雞眼,睇極都睇唔開。
