[喂,做個朋友啫...]

最近,時常都感受到一種無形既壓力,

每當我識到新朋友,又或者同我覺得佢可以做個朋友既人溝通既時候,

就好怕俾人感覺我扮熱情,又或者想同人有"更進一步既交流",亦即係溝仔,

內心總係好緊張自己有無做錯左,做多左而令人誤會,

於是有時唔知自己做咩乜,個人好似食左藥咁,明明同緊班朋友食野吹水,

都會好緊張好不安好拘謹,

哩種情況嚴重到o係好熟既朋友身上都有出現,

點解會咁架??

根據我自己專業既分析,

哩種情況主要出現於男性朋友身上,

每當我有事需要致電果D人既時候,

就會諗對方會唔會以為我對佢有興趣?想搵話題?定係有咩企圖?總之就借D意搵佢,

於是諗多兩諗,就會放低個手提,自己搵辦法解決,

如果係關於聯絡通知既正經野,我會搵其他女性朋友去通知果條友,

自己就唔使搵果條友,就可以避過左。

如果係無聊搵人傾電話既話,

噢SORRY,我從來唔會主動搵男仔傾電話,

最多係講完正經野順手傾一陣。

又或者咁,

自己有時都想人吹下水,講下無聊野,咁又知有邊條友得閒又吹得既,

想WHATSAPP下佢搲下水吹,解下悶咁啦,

正當我想打緊果幾隻字做開埸白既時候,

又會諗條友會唔會覆架?會唔會覆我"咁得閒搵D正經野做啦!"?如果唔覆既我咪好火羅好樣衰?

條友會唔會又以為我對佢色心起所以借意兜搭佢架?

於是就DEL哂D字,然後CLOSE左個WHATSAPP。

無事發生過。

[喂,做個朋友啫...使乜諗咁多呀?]

我問過自己好多次,其實使咩諗咁多?

口岩傾既咪傾,吹得兩嘴既咪吹,好簡單平常之嘛!

係係係....我明白,

不過,俾人拒絕得有番兩三次再食左三五七個檸檬再再搞出兩三個美麗既誤會過後(次數終純粹係加強語氣,不等於事實!!),

個人就自然會諗多好多,避忌好多,怕事好多,

好驚人地怕左我避左我,或者會暗示我唔係佢杯茶,又或者係直接同我講,
咁就真係樣衰到無朋友,
SO SAD。

其實,

我只係將D男性朋友當左係女性朋友,

可以咩都講,可以傾得興起玩得開心時有身體接觸都唔覺有問題,

偶爾地扮下可愛(嘔),溫柔一D(又嘔),撒野一下(再嘔),都唔覺有問題,

大家姊妹黎嘛!!有咩所謂~~~

唔覺唔覺咁就好似對D男仔好熱情好主動,俾人誤以為我發情期對佢投懷送抱,

加上一向慣左好似阿媽咁去照顧人,不自覺由工作健康家庭等都關心下問候下,

順便想打開下話題,唔好吹極都係D吃喝玩樂享受消費既表面野先得架,

於是又俾人誤以為我想查人家宅搜集情報,

哩單野真係用聖水都洗唔清。

所以呢,我哩個[同男仔做朋友驚恐症候群],都係無得醫,

註定身處社交生活但一直左顧右盼心不在焉地存在著,

認真你就驚

好耐無認真,係認真去寫下野,
其實近來都有唔少野有感覺有感觸,
不過,因為懶,因為想逃避,因為怕開名,
所以就無寫。

今日一個人出左旺角,見到一街都係蝗蟲,真係人都癲,
忽然諗到,如果有個槍GAME,係可以射殺蝗蟲,炸哂D名店藥房金鋪既,就真係爽歪歪!!!
行左幾個鐘,除左買野之外,都無講過野,專心咁行街睇野,雖然有D悶,對手都唔知放邊好咁,不過又好習慣,
我都想快D戒走撓住人既手既壞習慣,以前主要係慣左撓住媽咪,其次係撓幾個姊妹,
今時唔同往日,邊得黎有隻手俾我撓呀...點解我咁鐘意撓住人行?主要係因為我行得慢,好怕同人失散,撓實手仔就唔怕趕唔上,同埋我都幾無腰骨,鐘意挨挨貢,而撓住手就方便個人挨落人地膊頭度喇!!嘿嘿~~當然,哩D人全都係女性黎既。
咁點解哩個係壞習慣?當習慣有熟人O係旁邊一齊行就自然想伸手去撓住,如果旁邊既換左係男性就PK,唔熟都OK,
係熟既我就要忍住唔好伸手過去,雖然大家成日玩埋一齊都不分男女動手動腳有身體接觸,但撓手哩樣真係唔得囉!
因為我眼中男既都同女既朋友一樣,我當佢女仔好姊妹,佢當我男仔好兄弟,咁自然唔覺有避忌,所以時刻都要提醒自己,唔好亂黎。咩時候可以撓住男既手?應該都係我醉到企唔穩既時候嘞。

提起朋友,哩幾期大家都好多見面機會,計返哩幾個月,至少兩三次落左樓下間翠華食飯再去吹水,雖然都係HEA。
時間見證好多事情既發生,原來哩段時間Y同D拍起拖上黎!嘿...可憐我哩D所謂既姊妹,唔係第一批知道既人,
咁都介意?係咪太小氣呀?係架,因為我覺得咁熟都收埋,遲通知OK,但有其他人早過我地幾個姊妹知就唔OK囉!
Anyway,我都希望佢地好好地拍落去,最好係好到開花結果,步入教堂,咁就皆大歡喜。
另一邊廂,S終於同男友散左,我當然係開心,因為佢值得有更好既選擇,可以愛得輕鬆啲,開心啲,幸福啲;
不過見到佢咁傷心,我都心痛,唯有盡量陪佢傾訴,佢搵我就即刻騰空時間陪佢去做佢想做既事,我又無經驗,唔了解到底可以有幾傷心有幾心痛,所以,都係提醒佢要自我欣賞,要愛錫自己等,總之就唔好自暴自棄。
有個星期日,佢話好悶無野做,我就叫佢上我度整曲奇,材料用具我有齊,於是佢有佢整曲奇,我有我整餸煲湯;臨走佢仲飲埋湯先;當晚我細佬知我叫S上黎整曲奇抒緩情傷,竟然讚好,話我夠朋友!真係好搞笑。
之後S 於whatsapp 度多謝我,我回覆佢我只係做我可以做既事,就係支持佢,同佢一齊分擔面對,我只係想見到佢笑返。
哩幾句確係真心話,希望佢亦感受到我唔係得把口,真係有行動做得到;有時,真係覺得自己似係佢家姐多過係朋友。

講返大圍野喇,就係9月1日,我地有6條友過大海,去澳門一日遊,我當然係其中之一啦!
今次既一日遊之所以出現,其實係因為一個錯誤既決定;因為本來計劃左去海洋公園玩,苦苦相逼左L請假(佢係好難放到星期日既),結果佢成功請到假,不過得3,4條友去到,海洋公園單野就告吹,於是我同S為左要安撫L,就話佢當日想做咩想去邊我地都誓死相隨(因為係我地兩個先後打去叫佢向公司請假既),結果條友話想去澳門,咁咪過左大海囉。
一日既行程都幾緊密,主打都係食野,天氣好好,曬到爆,我地去到十月初五街,行左陣想走,我即刻大叫唔走得,點都要行埋去大三巴前面影相留念!!難得我地黎到澳門,無張同大三巴合照既集體相點得架!
之後又去搵我間葡撻店---瑪嘉烈葡撻,問左好幾個人,先識得點行去,嘩,原來好多人幫襯緊,等左陣先有三個位坐,
男士們就好好地讓哂俾我地三個女士坐;個葡撻實在好新鮮,又香又滑又熱又脆,所以即使好熱好熱,我都好心急食哂落肚!!!
除左食,當然係去賭場見識下!嘩,銀河個娛樂場,即是賭場,真係大到痴線,行極都未行完,我哩D小學雞當然係參觀下就算,無落注,因為我根本唔多識玩,無謂浪費金錢,只係得L同Q有落注玩兩手,結果呢....係無輸無羸既,想屈佢地食一餐都唔得!!
離開賭場,我地就過左氹仔食晚飯,本來係打算食葡國菜,不過有團員想食平D,就去左一間出名係蟹粥既食店,
我地叫左一條超大既鱔,$2XX幾銀呀!!不過就超肥美超好食!!仲要只得我地三個女士食,食完真係成年唔使再食呀!
而其他炸田雞,蟹粥都唔錯,大家都好飽。
就係咁,一日遊就咁完結。