還是要靠自己

人,還是要靠自己。

我發現我所需要既力量,

其實最好係來自自己,

而唔係來自身邊既人;

唔係大家待我唔夠好,

我心知關心既人真係好關心我,待我好好,好照顧我,

只係,

如果我永遠要靠住大家既支持關懷先可重新振作,

唔懂得靠自己既意志去振作,係唔得既,

因為人始終要成長,要獨立,要自己去面對事情,

所以一定要學懂如何自強不息,要訓練自己堅強勇敢,

先可以俾到自己正能量,有勇氣去面對人生中大大小小數之不盡既困難痛苦,

需知道好多困難係只有自己先可以解決,

好多痛苦係只有自己先感受得到,

無人可以幫到亦無人可以開解到,

完全係自己同自己既內心交戰。

我一向性格懦弱,思想負面,依賴別人,

以為有朋友,有前輩,甚至有情人既鼓勵關懷,我就會積極振作,

但原來唔會,

只要我一日想唔通,一日都會意志消沈,

即使身邊既人安慰再多都無用,

所以,

我明白要靠自己振作,要自己俾自己力量,

要自己支持自己,

從心底裡給予自己勇氣,

先可以面對所有困難。

假如我真係做得到,相信最高興既會係身邊愛我既人

因為我唔再令佢地擔心了。

媽媽說:[不用急!]

曾經,

我急於找個男朋友,

因為希望讓媽媽開心一下,亦放心一些,

可惜,她終於也等不了,

只怪我條件不好,要求不夠低,

始終完不到她的一個心願;

很抱歉。

幸好,她身故前,精神尚好時,

跟我說過,找男朋友,

當然要找個待我好,人品好,正直,顧家,無不良嗜好,

最緊要是不要為了結婚而找男朋友,

再急也要想清楚,因為結婚不是鬧著玩,

我告訴她,有人追求我,我亦有心想發展一下,

但對方的大前提是要我跟他一樣,視他為結婚對方,

否則便不要發展了,

我問媽媽那該怎麼辦?未開始拍拖,我已感到很大壓力,

她問對方人品如何,外表如何,是否認真的,最重要是我對他感覺如何,

還說我不要對人家要求多多,有機會便發展一下,

我一一告訴了她,

然後,她叫我不要答應對方,

因為他一開始已經有這麼大的期望,如果拍了拖後,有日我要分手,

他會否接受不了?如果他反應很激烈怎麼辦?

而且未正式相處過,便要視他為結婚對象,是不可能的,

媽媽說還是不要管他了,

一拍拖便說要結婚?不要說笑吧!!

她叫我不合心的,便算了罷吧,不用急,

她女兒我的條件又不是那麼差,用不著為此而煩惱太多;

我邊聽邊看著媽媽的臉,她的眼神和表情告訴我,她因我而自豪,對我很滿意,

絕對相信我能找到一個合心合意合得來的男人,

所以她不擔心我。

當時我已十分感激媽媽的思想開明和清晰,

亦很高興我們母女之間可以毫不介意,坦率地討論這些事情,

因為我知道只有她才可給我最中肯,最可信的意見和答案給予,

她是我的指路明燈,告訴我方向;

現在回想起來,

我的感受更深,因媽媽已經不在,

這段對話更加深刻,

很感謝她的提醒,令我往後如何找男朋友,怎樣去決定婚姻大事等,

也有了方向和主旨,

就是她對我的信心和欣賞,已是任何人也比不上,

她是我最忠實的支持者,

因為,我是她最滿意的女兒。

媽媽,對於感情事,我會知道怎樣做的,

請妳在天上好好看顧我,

我會遇上一個妳會讚好的男人。

發現一篇過去的文章...好多感慨

好耐無寫"我想講"系列,

因為發生太多事,但全部都唔想講,唔想提起,

所以,就無寫。

OK,let's start!

我想講,我應該可以接受到媽咪離開之後既生活;哩期不斷咁提自己,要假設媽媽不在,咁我會係咩心情,我會點解決問題,我會點睇住屋企,而屋企又會變成點...等等,總之,我逼自己去習慣;

係咪好變態?明明唔捨得媽媽離開,但又要自己習慣佢離開後既生活環境,嘿...真係痴線!!

不過真係有需要,因為我知我會沉溺於哀痛之中,終日以淚洗面,不能自拔地放棄自己,

所以,提早逼自己適應,都係好事。

我想講,我真係有諗過,其實如果媽媽離開,都係好事;媽咪哩一年幾所受既痛苦,我只係睇都覺得好難受,更何況佢係受果一個?所以佢成日又喊又鬧話我地無人會明白佢有幾痛苦有幾想自殺,我唔會怪佢鬧佢,因為我諗起佢手術後插哂喉,訓係病床唔食得唔飲得,手術傷口由左至右橫越整個腹部,條疤痕以後就好似條蜈蚣一樣留o係身上,整個人一直消瘦,行路慢好多,落街俾人投以奇怪既眼光,d師奶朋友同佢打完招呼轉身即閃,自己行耐d企耐d都覺得好勊,大熱天時無汗出,仲要覺得凍或者涼,食完野唔消化又嘔哂,無胃口只係食到粥,食多d食飽d個胃又好痛,每日吞好多粒藥丸,打糖尿針...實在覺得非常心痛,如果有日佢太痛苦,我寧願佢早d離開,得到解脫,脫離癌症既魔掌。

我想講,以前我對婚姻既睇法,同埋目的係為左咩,諗法好簡單好朦糊,不外在乎係同鐘意既人一齊生活,同對方生毛育女,互相遷就一下,老來互相扶持咁;

但近來就清晰明確好多;

我覺得現時d人婚姻目的係為左將來小朋友有個名正言順既身份,為左同父母有個交代,圓佢地既心願,為左防止對方再識過另一個結婚對象,為左脫離剩女草食男既行列;

而我自己既睇法,婚姻確實係為左名正言順地生小朋友,更重要係要搵到一個理念相同,價值觀相同,即使各自有難頂既缺點仍然真心相愛既人,同自己一齊行將來人生既每段路;我需要一個會跟我分享分擔既人,即使係苦都要跟我分享既人,因為選擇結婚,就是當對方係人生伴侶,唔止係談情說愛卿卿我我咁簡單,而係要一同面對大家之間既問題,以及各自既問題,因為我老公唔止係我愛人,仲要係我既朋友,師長,心靈輔導員,私家看護;相反自然,當佢有事時,我會一直守候佢身邊,提供佢所需要既野。

家人會老去,朋友有家庭,孩子有自己既生活,只有老伴能相隨,

婚姻,就係咁既一回事。

我想講,鐘意一個人真係唔難,但要接受埋d缺點,仲要忘記自已本來既原則先最難;

能夠得到對方既欣賞愛慕當然開心,對方待你好對你獻殷勤,你可以受之無愧,但其實你早已知道對方係有缺點,有d你一直唔接受到既不足,結果,當對方開口問你可唔可以接受佢同佢拍拖時,你就答唔到一句可以定唔可以;

要有得,就要有失,你要有拖拍有人錫,就要接受對方未必符合你所要既條件,

舉例,個男人好顧家,放工就返屋企,仲好愛你唔使你去打工,只係照顧屋企,但佢唔識講笑,無咩驚喜俾你,悶蛋一個,咁你接唔接受到?

又或者個女人外表出眾,有穩定收入可以同你一齊供樓,仲肯生小朋友;但佢好小氣,疑心重,管得你好緊,時刻都check住你,咁你又點揀?

世事就係唔伯有完美,想得到,就要預左要失去,

想有人要,就要放棄自己既原則。

正所謂:[食得咸魚抵得渴],係抵得渴,先好食。