一個人無夢想,同條咸魚有咩分別?!!

[一個人無夢想,同條咸魚有咩分別??]
星爺既名句,唔止深入人心,最近仲成為中學生奉為古語,
同[人生得意需盡歡,莫使金樽空對月]睇齊,可以作引經據典之用,
我實在替一眾中文老師不值,多年既教學,都比不上星爺既電影,同一句對白咁植入學生既腦中,
教師們睇黎要向星爺好好學習,嘿嘿......;
但其實當年我地做學生都一樣咁學習,係會記得古人既名句,即使到而家都仲要記得多少,至少,唔會腦殘到拎電影經典對白當古話咁引用囉。
照咁睇,其實我地根本係勤力既好學生,仲要係無腦殘既。

可能本人既花名既關係,一直都對哩句[古語]有多少敏感,聽到就總覺得係揶揄*緊我(註*即係[串]);不過,哩句野確實係有意思,而我又確係無咩夢想,最多係識講而唔識做,當朋友們正向夢想理想一步步進發,一步步將之實現既時候,我仍然停滯不前,問心,我係有自卑,有慚愧。
相比以前,我更加唔去計劃將來;以前係唔識,而家係唔想,因為我唔相信將來,一切只看眼前,只顧當下,有點[今朝有酒今朝醉]既心態,對人對事都採取即興既態度去處理,咁當然係會先分輕重既;
哩種態度,好聽叫隨心隨意,活在當下,唔好聽既就係思想消極,放棄自己,唔識諗唔上進無大志....等等,大部分既人係會以後者去形容,我當然聽過不少人咁形容我,批評我。
大家不約而同地對我講,人生仲有好長,要積極面對,唔好放棄對夢想既追求,將來仲有好多可能,生命長短無人知,點解要咁早放棄?長或短都可以追求自己所想,趁仲年青,應該好好發揮,學習更多,嘗試更多.......等;我大致上都識背果幾句成日出現既內容,聽得耳朵麻木,有多少反感,我只係想順我自己既心意生活,唔想諗咁多,追趕咁多,做個平凡打工仔,月月有糧出,夠食夠使就算,
點解唔可以?點解我一定要計劃將來?點解咁肯定會有將來哩回事?
我知,咁講會令部分關心我既人好失望好不滿,但哩個係事實。
坦白講,夢想唔係無,只係唔係咁簡單可以實現,亦唔到我控制,唔...其實...唔可以話係夢想,而係一個約定;我記得,當日於媽咪既床邊,我摸住佢臉龐,悲痛而激動地要將所有我想講既說話講哂俾佢聽,俾佢知,我記得,我同媽咪講,好幸運可以成為佢個女兒,得到佢盡心盡力既照顧,以及毫無保留既愛,令我一直好幸福,今世佢辛苦了,下一世就調轉,由我當佢媽咪,佢做我女兒,俾我好好照顧返佢,盡我所能去愛護佢,等我回饋返所有既幸福俾佢;那時,媽咪已經回應唔到我,但我知道佢一定聽到,一定會答應我,我叫佢一定要記得,我地下世要再做母女,所以,算係跟佢約定左。

因為哩個約定,我開始諗:[我點先會做到媽媽,生到個女呢?],再諗:[我會唔會有機會做媽媽先?],再諗落去:[有邊個會同我生小朋友先?],再諗埋落去:[我會唔會有機會結婚先?],再諗諗下又諗到:[有無個係佢愛我我又愛佢既男人會同我結婚先?],最後諗到:[我有咩條件去愛人同要人愛我先?],
唔,睇黎搵到問題既源頭。
或者我係自私,竟然因為要跟媽咪再見面,而想去結婚生小朋友,我唔否認;不過,更大既原因係我想將媽咪灌輸俾我既一套正確價值觀延續落去,等我既下一代可以承傳落去,亦希望可以替屋企帶來新既希望同快樂,一個家多一個新成員,尤其小朋友,係最開心既事,媽咪講過一句疑似係外婆外公講既古老話:[屋企張飯檯四隻腳鑲金都唔笑,多個小朋友就哈哈笑],意思即係屋企幾富貴,都唔不及一個小朋友可以帶來咁多歡樂,當年細細佬出世,家中各人都好高興,因為家族中好耐無新生命誕生,即時多左好多話題同歡樂,所以媽咪就咁樣形容。

返回問題既源頭,先要令自己變得有值得人愛既條件,於是,我研究買餸煮飯煲湯整甜品;我學習處理更多家務;我努力維繫家人既關係同家中既氣氛;我變得更主動關心身邊我重視既人;我嘗試搵最適合自己既妝容衣著,我不斷提醒自己不再年青,思想要更成熟細密;(句句都[我咩咩咩..我點點點...],點解咁似689條走狗既?!!)。
似乎,有樣重要野漏左,就係----------減肥同保養身體;噢!明顯係我最想逃避既題目,但又係最急切既題目,係係,係要認真去減肥,咁我都有左個決定,就係嘗試搵人幫下手,希望真正幫助到,又快見效。至於保養身體,我的確係好懶好唔緊張,成日唔理,同樣要下一下個決心,積極跟進改善,否則,永遠都兌現唔到個約定。

最後想講,其實,咸魚未必無夢想,只係在乎個夢想大定小,難唔難去實現到啫。

懂得尊重自己和別人便不是港男與港女

我,
終於明白了,
原來事情是這樣,
事實是真的,
男生的話是表面的掩飾,
背後的事實卻是顯而易見,
吃著碗裡,看著碟上,
都是因為貪心;

現在,
香港的男生中,
我敢說是有善良的好男人,
不過一定少於40%,或者30%,
其餘的60,70%,
都必定是自私的賤男人,
眼見的,聽聞的,親身經歷的比比皆是,
所以不要說港女什麼不對什麼不是,
港男也不是什麼好東西;
假如,
你還有些良知,自重和修養,
敬請好好保持,繼續尊重別人,尊重女性,
不要隨便變成賤男,
把女性當玩具,把尊重當垃圾,
把關係當遊戲,
這些人,根本不配當男人;
真正的男人是不會這樣的。

相反,
女性也要自重,
不要視男生為僕人,或者主人,
不要呼之則來,或者千依而順,
男生是要面,要尊嚴的,
同時也不能服從的,
請緊記自己不是女皇,也不是女僕,
而是一個女人,或是是一個女朋友,
否則,
請不要怪別人在背後稱呼你是港女。

我自己?
我不依賴男生,不是小鳥伊人,
沒有一個"觀音兵"可以指揮,
優點我會欣賞,不對的我會批評,
所以,我想我不會是別人在背後說的港女吧?!