一個癲哂既晚上

雖然時間過左咁耐,

但我諗,我真係只對你有感覺。

大前晚(39/3),倩兒生日,約埋去唱K慶祝,

可能好耐無一班人去唱,我個人黎講係比較興奮,
放左工就急急腳趕上機鐵出去,

當然,你既出現我都幾意外,心諗:細粒出手,真係個個都到;
我係最遲到既人,坐低倩兒細粒就叫我嗌野食,,我其實就唔多肚餓,見到咪就即刻掛住揀歌,
好想快D唱到歌,你又叫我嗌左野食先,咁我就擰住張meuns開始揀野食,
佢就幫我CALL左職員拎餐具,個職員黎到,問放邊,佢望下我話:[哩位小姐既.],個職員就放係我面前,我聽到佢咁講,忽然覺得佢幾gentleman!俾我只係叫個職員:[放低得喇.]咁,佢稱呼我"小姐"喎!難得難得。
我食緊野時,就已經見到檯上兩支綠茶,一支black label,同埋4個骰盅,嘩!又會玩到癲左,飲到傻左!
希望一陣唔好輸得太勁,我唔想又飲到嘔死左...
可能好耐無唱k,我都唔知點咩歌,一黎只係揀左sammi既歌,當開聲啦;倩兒似乎志不在唱歌,係咁叫我地玩骰盎,猜枚,我就食完先玩,睇住佢地玩先;佢地玩大話骰,我都識既,所以加埋把口,點知俾倩兒話咪咁多野講,快d落場玩!!
好啦,食飽就落埸!!!由於有細粒,所以我好少輸,點解?因為佢成日忍唔住要開人地,結果中哂招,佢同你又水溝油咁,係要鬥嘴,唔放過對方,於是細粒成日被跣中!哈哈!!倩兒都輸架,不過佢生日,所以左咀英勇地話左今晚佢幫倩兒頂哂d酒!!結果,佢無份玩,只係唱歌,但就好快飲到面都紅哂!!
可能你溝得比較輕手,我咁唔飲得,飲左幾杯都無事,不過都口岩既,仲有成晚咁快溝哂d酒點夠玩!!
大話骰玩左輪,倩兒教玩新野,轉到用手玩,點玩?就係一個伸隻右手出黎貼埋一齊,做一個[like]既手勢,不過就收埋隻手指公先,咁另一隻手就要聽玩家既指示做姿態,主要都係要掂住隔離果個人既身體;咁之後就逐個嗌數目,各自豎起手指公,叫中豎起手指公既數見,就要拍落去,拍最遲既就輸。倩兒一開始就話要掂住隔離既下巴,而我隔離既係你,即是你掂我,我掂你,我摸落你下巴就俾你d鬚根拮,我話你做唔咩剃乾淨!!佢無理我,伸手掂落我下巴,OMG!我忘記左哩個地方係我既死穴,超敏感!!佢掂到我時,我真係有怕醜囉!救命!!唉...原來我仍然咁敏感><
咁玩落去,人人既指示都唔同,攣毛同謝健最客氣,只係需要手落後面,倩兒就最唔客氣,PATPAT同心口都夠膽講!!我同細粒都大嗌唔好,搞笑地連佢地三個男仔都話唔好,結果改左放係隔離條腰,咁當然,你就係搭左落我條腰度,果下,真心真係幾開心囉。
到我出指示,我揀耳仔,本來簡單係伸手就可以掂到隔離既耳仔,不過倩兒要增加難度,要掂左邊既耳仔,咁即是隻手要撓過個頭,從後去掂住隔離果個人既左耳,哈哈,我地被逼要CLOSE D,
我就要彎低D等你可以掂到我,而我就好輕易可以掂到攣毛既左耳!!
我覺得個GAME其實都係想增加大家身體接觸既機會!!

玩完一輪,係時候唱下歌,
我發現飲左酒係唱得差左,可能喉嚨既肌肉放鬆左;連唱左四首,分別係[你是答案][最重要的決定][熱戀之後]同[一瞬間],當我唱完[最重要的決定],細粒同我講,我有無打算參加歌唱比賽,我話無喎,做咩咁問,佢話我唱得真係唔差,好穩定,係可以參賽既水準,我聽到只係識哈哈笑,然後繼續唱;
當我唱到[一瞬間],不自覺望向你,因為我覺得首歌其實係講緊我對你既態度,而你都係望緊個mon,應該係聽緊我唱啩;可能因為你在場,我唱得好落力,當然,保持水準!

骰盅真係玩法無限多,好在我無飲醉,唔係輸好多,不過細粒就唔掂,係咁輸,於是係咁飲,我都忍唔住幫佢飲左幾杯;由於已經HIGH爆左,D懲罰開始好癲;
本來輸左飲啖酒,之後就發展到女仔彈BRA帶,男仔彈底褲邊!!真係好正囉......我地三個女仔都好大方既,彈就彈啦!!反而謝健要擰轉面,背住我地黎彈;良友就無加入,因為佢話唔想自己被彈,所以唔彈人喎;不過玩多幾次,就改做打PATPAT,哈,哩個仲正!!大家出盡力咁去打,打到[啪啪]聲!!
打既就爽,被打既就痛,仲要飲埋酒,嘩.......真係不得了!!
由於倩兒係壽星女,左咀早就話佢輸左就幫佢頂,於是除左飲酒,就係捱打!佢唱啪下歌俾我地叫佢起身打PATPAT,佢真係O哂咀!!唯有硬食!!

不知不覺,已經兩點幾,而細粒同倩兒兩個已經訓低哂,一個就醉,一個就眼訓,即係話,係時間要閃人;我地分別扶住兩位小姐,我扶細粒,左咀良友就陪住倩兒,慢慢行去搭泥鯭的。
好耐無咁夜o係旺角,但原來比以前多人左好多,我地經過一間通宵既點心鋪頭,
我忍唔住話不如飲個放茶食點心啦~~攣毛話無問題,叫醒醉左果兩個先啦!!哈哈.....我話應該無人陪我癲。

返到屋企,嘩!差唔多四點!!

朋友,就這樣已足夠

已經不只一次,

被說教要認識多些朋友,多些不同層面的朋友,

藉此擴闊生活圈子,對個人的見識和發展也有幫助,

我對此沒有異議,

擴闊社交圈是可以,

但叫我減少跟現時的朋友混下去,

則絕對不可。

我的朋友,

不是李首富的兒子,不是什麼富二代,

不是什麼律師醫生會計師金融才俊,

不是樣子甜美身材一流模特兒,

只是很平凡的人,

他們是腳踏實地的打工仔,

是善良,真誠的人,

我就是喜歡這樣的他們,

因為,沒有競爭,沒有比較,沒有機心,

相處沒什麼壓力;

大家聚在一起,

吃喝玩樂可以,

安靜談天可以,

認真分析可以,

兩三個人可以,

一大班也可以,

只要時間許可,

便能無事常相見;

經歷巨變,人不可能沒改變,

也不可能再盲目,是會清醒一點的,

陪我一路走過最悲最傷最痛的日子的人,

我也會視之為好友,亦心中有數

沒有他們的陪伴,鼓勵,開解,邀請參加活動等,

我可能仍是終日淚流滿面,再站不起來的那個我,

而他們心中有我,願意關心我,

就已經值得交朋友了,

自問沒有什麼了不起,也沒有什麼[著數]可以分給別人,

但在我最低潮最谷底時,卻有這些朋友來關顧我,

心裡真的[暖得像個溫暖既太陽]。

不管將來,只問現在,

對我來說,

只想彼此健康快樂,努力生活,積極進步,互相支持,

重要緊記無事常相見,

朋友,就這樣己足夠。

第9個月

早幾晚,我又夢見您,
當然你情況已經不大好,
我有事要出去,我肥佬陪住你,
唔知點解我唔捨得離開,一直坐O係您身邊,
攬下你,挨住你,
我攬住你話我唔捨得您,擔心再見唔到您,
您微笑住咁話:[得喇,我知道],然後伸手摸下我個頭,
之後我始終要出門口,我不斷回頭望您,
心裡面覺得,我返黎既時間,就會見唔到您。

媽咪,你係咪都知道我好掛住你?
仲知道我好想攬住你呢?所以黎探我呢?
我終於聽您話,辭左職!!!...不過就未搵到新工,
如果你O係度,我就日日可以陪你飲茶喇!
您係咪都支持我咁做?但又擔心我唔知幾時搵到工呢?
哩層我都有D驚,不過,您成日話做事要[爽D先得架!],
所以,未搵到工,就做多D運動減下磅先,
您留低果D靚衫我好想著呀!!但要瘦返好多先著到囉....-_-

媽咪呀,今年母親節,我叫PIZZAHUT外賣返黎同你一齊食呀!
雖然......雖然我應該會忍住眼淚咁食;
媽咪呀,1/6您上位,到時等我再一次錫你一啖,等你好好記住。
仲有,我就生日喇,您要記得黎探我,當係送俾我既生日快樂,知道嗎?

媽咪,我永遠愛你

一個遲來的安排

原來決定要離職之後,就好似有好多野要交低咁,

可能係我唔放心,

又或者我想俾人覺得我唁係[拍拍屁股]就走,

想自己形象好d;

今日當我埋頭工作時,

聽到隔離部門既主管們討論新接手部門既工作,

哩個部門都幾重要,亦唔易管理,

我一向都處理哩個部門既收入,

算係好了解當中既運作,

我一面聽一面諗需唔需要俾d意見佢地,

至少講低有咩要留意,有咩最易出錯等,

於是,我忍唔住走過去,問佢地我可唔可以俾d意見,

佢地幾位主管好歡迎,話自己咩都唔識,

經理只係交低叫佢地接手管理,其他細節完全欠奉,

我話都幾多野要留意,因為佢地唔識,部門既同事又新,

加上我遲d唔做,咁佢地想問都幾難,

其實我未想講我辭左職,佢地似乎有少少意外,

之後,大家聽我講左部分工作既流程,而家既工作情況如何,

仲拎埋所需要既單據俾佢地參考,

當我地討論緊既時間,

某位主管同我企得好近,一齊拎住單據好認真研究,

佢問我可唔可以寫低有咩要留意,等佢地可以參考,我話如果需要都可以既,

不過等佢地去視察下先,我而家只係講過大概情況,

之後佢地了解完,我再做俾佢地都無問題,

佢話都可以,再同其他主管話過兩日去視察時要記得留意,

另一主管聽完就話以後都會時時有問題要搵佢地,

始終錢銀交易多,銀碼又大,好容易出錯,

我話哩個一定,不過到時我已經離職,

研究完一輪,佢地好歡迎我俾意見,

話有咩唔明搵我,因為佢地完全唔清楚流程,

我話無問題,隨時搵我。

之後,

我就諗,點解我辭職,佢地先接手哩個部門?

如果,我唔辭職,以後咪好多機會同某主管接觸囉?

一個遲來既安排,令我有D後悔辭職.........

不過我留低,都唔等於會同佢進一步了解,

可能都係同事一場,純粹工作關係,

唉,

我竟然真係有點唔捨得佢,如果....

如果我地可以交換電話,就好了,

或者LAST-DAY之前食餐飯,

或者影張合照,

算係留念,

佢哩位筍盤,好男人,我都係無資格得到喇,

希望往後o係朋友既舊同事既聚會中見到佢一面。

估唔到佢可以令我有咁深既感覺。

當寂寞時...

當寂寞時,
當煩惱時,
你會選擇一個人.
還是找朋友,情人?
拿起電話,
打給情人,打給朋友;

最後,
還是一個人,
因為沒有情人,
也不便打擾朋友,
所以,
要習慣單獨一個,
因為
沒有誰會不問情由不求回報,
沒有誰能無時無刻隨時隨地,
給你找到前來相伴。

你有寂寞時可以隨時找他/她的人嗎?

斷掉所有後路的決定

要做一個決定,如果要成功,
就先要斷掉所有後路,
不要給自己回頭的機會,
那麼,
就只有一直向前,
因為,
已經回不去了。

當我決定離開時,
除了考慮到很多原因,
更想到自己會否一時心軟而回頭,
於是,
先想好所有留下的理由,
再分析一下,
值得不值得我回頭;
結果,全都比不上對離開的期待,
即使有的是感情。

估不到自己能夠那麼堅定,
可能真的累了,厭了,
原來,
聆聽清楚自己的心聲,
認真看待自己的需要,
正視自己的感覺後,
是什麼都動搖不到我的決定,
信心和勇氣,就這樣冒出來,
令語氣也淡定起來。

前路根本似有還無,
但仍是要出走,去找一找,去看一看;
人生,有時需要一點衝動,
才會有改變,才會更豐富,
離開,
絕不是為了回來。

真心覺得開心

尋晚,
o係買完餸趕住屋企煮飯同阿哥食,
因為佢等緊我,
當然已經8:30;
我見到前面有三個人影好熟口面,
哦,原來係你地,一睇就知係打完波,
我本來都諗下有咩同你地講,
不過,心諗已經我好趕時間,
你地慢,我快,
好快我就行到去你地身邊,
佢兩個首先見到我,
我無除headphone,同佢地hi兩下,
其中一個好似有野想同我講,口up up咁,
不過,我無理,hi完就轉頭直行返屋企樓下;
當時我個腦只係諗住返上樓後要煮咩先,
一定要9:00前食飯等等等。

等緊lift既時候,你都行到黎大堂,
我亦除左headphone,望向你,
你即刻問我:[做咩行咁快?],
我話:[我趕住返去煮飯,我細佬等緊我],
你再講:[唔開心就唔好煮啦,叫佢地自己搞掂!],
我:[下...唔開心?...咁唔好既,我都買左野...]
[咩唔好,叫佢地去買麥記咪得囉!]你即刻搶住講,
咁口岩有街坊同我打招呼,我答唔到你,
你都轉身入左lift喇,
而我先開始load下你頭先講緊咩。
....................................................................................................................
事情就係以上咁簡單普通,
但就引起我無限思潮;
至少覺得好想笑,
點解我行咁快?
你係咪覺得我要就返你地既腳步,同你邊行邊傾?
定係...你已經習慣左呢?
咁,點解你又會認為我唔開心?
就係因為我唔出聲唔傾計?
仲要叫我唔好煮飯?
你覺得我唔應該咁辛苦嗎?
我真係唔明點解,更加想問既係:
點解你咁關心我?或者係點解你'好似'好關心我咁?
到底係咪我諗多左呢?

老實講,真心覺得開心,
至少我覺得你係留意我,係關心我,
仲為我好,叫我唔使煮飯俾細佬食,
我真係估唔到你會咁講,
你一直唔贊成我要對屋企負上太多責任,
你話最緊要顧好自己既事情先,咁先係對屋企好,
我記得你有咁同我講過。
嗯...
其實,係咪我一向諗得你太冷血呢？