日常雜想@15-3-2015

<夜媽媽先黎講認真之友拖拍>
每當身邊有朋友宣布有拖拍,
我都會替佢好高興,講真到左我哩D年紀,好命既都做左人父母,仲要單拖一丁嘅多多少少都係陰公豬,所以,能夠脫離單拖,係值得開心既事;
不過,如果係朋友之間既戀情,老實講,其實我就擔心多過開心,
雖然朋友之間男追女,女追男既情況好平常,
有時我仲會鼓勵佢地去追,咁難得有感覺,仲要係識嘅,熟絡嘅,
梗係要去馬啦!
成功左就最好,然而,我會開始諗:如果有日佢地散左分左手,點算?
係咪又係搞到[佢黎呀?咁我唔出現喇!]或者[我唔想搞到大家氣氛差,我都係唔黎喇]又或者[喂唔係呀?!你又叫埋佢黎呀?我唔想見到佢囉!]等等,
大家都知,情人分手可以好和平好理性,亦可以好麻煩好多手尾,家陣仲係有共同朋友,同一個圈子玩開嘅,咁就影響埋朋友;
一個果頭話個男既好衰好賤,一個哩頭又話個女嘅好煩好難服侍,
咁叫朋友幫邊個好?
之後嘅聚會,活動,都唔知叫唔叫埋佢地好...。

相反,拍得好穩定,好甜蜜嘅,影響就無咁多,只係有活動要約人時,一個唔到,就即係兩個都唔出現,又或者活動時唔滿意就一個黑面,另一個難做兼成班朋友難頂咁啫;其他方面,都無咩好大影響嘅。

當然,識朋友圈以外既人做情人,我都會擔心,擔心會無左哩個朋友,因為佢遲早會過左檔去情人果邊既朋友圈,從此消失於我地本身既圈子。

唉,我老喇,咩都驚咩都擔心,驚無哂朋友,得返自己一個孤兒仔咁,
希望你地個個一雙一對,有兒有女既時候,會諗起下我哩個孤獨阿毛,會請我上你地度食餐便飯,就夠架啦。

日常雜想

點解香港拍唔到咁既FEEL既MV?
點解拍唔到咁青春咁校園咁學生既效果?
除左大量商業同市場條件所影響之外,
我覺得係無咁既景,俾你搵幾個女仔著校服一直向著日落奔跑,
即使有景,香港無邊個女演員可以有咁清純既感覺,老實講,我只可以諗到唐寧,林嘉欣兩位,即使佢地已經係媽咪級,要後生既,我諗到顏卓靈,王敏奕兩個,哩四位既笑容好甜美,眉宇之間亦會表現到羞澀,倔強,靦腆既感覺,要演繹內心複雜感情直接既女學生,相信係無難道。

⋯⋯更多

讚 ·  · 分享

日常雜想@2-3-2015

儘管現實中要面對的問題有多難解決,請記得能夠遇上一個跟你相知相愛的人同樣難,所以要好好珍惜彼此,努力去解決問題。
-------------------------------------------------------------
估唔到哩D咁感性,比較積極既說話會出自我手,
但的確係真,時下既人大部分都未必係好滿意而家既另一半,總有諗過如果當年同左阿邊個一齊咪好囉,又或者其實自己係值得同一個更好更正既人一齊囉,又又或者如果我果個佬/女人可以好似阿邊個果個佬/女人咁就好啦....等等;於是好易分手,好易離婚;
講真,閣下有否諗過自己有咩值得對方要對你好好,要對方對你既要求通通SAY YES?對方對你好,係出自愛,係自願先會照顧你,關心你,愛護你,咁你自己又做過咩呢?有無珍惜過對方呢?
到彼此之間出現問題,大家唔咬弦,傾唔掂,就即刻忘記哂過往,或者前一晚既好事開心事,反目成仇咁,好快就去到分手,去到離婚;
唔識珍惜,俾你遇上再好再完美既人,都係無意思。

日常雜想@1-3-2015

如你是我,你先會明;
所以無人會明白我;閣下覺得我係無謂係無意思,係因為你無代入我嘅身份思想背景去思考,ok,find!
你唔會知道一件你認為無意思嘅事對我嘅思緒會帶黎幾大嘅影響。

如果一切可以返轉頭,而家會唔會變成咁？？

 — 覺得我係鬥雞眼,睇極都睇唔開。

日常雜想@27-2-1015

講起公司啲低智高層真係火都黎ヽ(`Д´)ﾉ
地面有個大窿,係你地就話試下跳過去先,
喂,實跳唔過,實跌落去架喎？!
你地話跳去過睇下先…
Ok,我跳,結果我跌左落個窿度,
跟住你地話,哦,係喎,跳唔過喎,咁可能要擺塊木板先過到;
喂,照睇都唔會過到啦下話？要我跌左落個窿先知？咪玩啦！
我哩啲小薯仔真係咩都唔識,實在唔明白啲高層嘅腦袋係諗緊咩,可能到有日我做到高層嘅話，就會知道啦~hi hi~

日常雜想@17-2-2015

<夜媽媽先黎講認真之過年時節倍思親>

老土都要返句:[眨下眼,又過年!]...
其實我本人黎講呢,過年其實無太大分別,
唯一係街市唔開,咩都加價,電視不斷見到汪阿姐,家燕媽媽同財神...其他野,都係差唔多;
黎到第三年既農曆新年,我好似已經習慣左,唔再覺得好驚,好想逃避,始終經過左兩年既時間,生活還是要繼續;
過去既一年,我為左令自己可以放鬆心情,於是逼自己去學烹飪,除左不斷煮中菜,仲玩埋烤雞烤义燒,焗蛋糕焗曲奇,整湯圓煮糖水,結果,而家隨時都整到幾餸一湯,或者焗個蛋糕送人做生日禮物都無問題。
好多人以為我一直醉心烹飪,所以咁好心機,又或者屋企廚房好大,工具好齊全,所以可以盡情咁運用;以上全部都唔正確,其實我只係想從烹飪中俾自己紊亂既思緒可以有停一停既機會,將所有既壓力暫時擺埋一邊,俾個腦可以放空一陣;
有朋友見我成日掛住買餸煮飯煲湯就覺得我俾太大責任自己,屋企個個有手有腳可以自己搵自己食,唔使下下都要我去準備;先多謝朋友們既關心,我無覺得係壓力,亦唔覺得係我太顧慮個屋企,因為哩樣係唯一,亦係我對屋企可以做到既最大,最有用既付出,以前每晚一家人會坐埋一齊既時間最長就係食飯既時候,媽咪講佢今日買餸既經過,講佢點解整哩D餸;我講返工有幾勞氣,D同事對我有幾好,有幾唔好;老豆講佢公司D人有幾騎呢,做野有幾渣流灘;阿B講佢學校D同學有幾搞笑,老師有幾無聊;阿哥講佢D師弟有幾懶,蛇頭有幾多野俾佢做;每人都會講自己每日發現過既事,遇過既人,即使講哂粗口,仍然係每日最好既時光;
我重視屋企人既飲食,著緊一齊食嘅每餐飯,無非係想嘗試延續哩個時光,俾大家有坐低傾下計既機會,即使彈我煮得差都係溝通既一種,我想一直保持下去;
另外,以前時時陪媽咪買餸,o係媽咪旁邊睇佢煮餸,佢既教導同心得,原來我係學到好多,記得好多,當我不斷咁煮哩樣煮果樣,又嘗試煮下媽咪以前既拿手小菜時,D記憶就返哂黎,一邊煮一邊感覺到佢就o係我身邊睇住,佢既說話彷彿o係我耳邊響起,教我要點做咁,媽咪就好似無離開一樣,只係隱形;所以,我好鐘意留o係廚房。
當然,我咁講,實有人話我其實仲未放低媽咪離開既事實,咁樣過生活係苦左自己,唔俾自己向前走;請問,我可以唔接受哩個事實?當然唔可以,我努力令自己重過正常生活,工作,社交,學習...已經算係回復正軌,但內心既思想,性格已經轉變左好多,如果連我藉著生活中既細節,模式去懷念,去承傳我媽咪既一切,都叫係放唔低,咁未免太刻薄吧!我唔係一個薄倖既人,而哩位係我既至親;我能夠從沈溺於哀傷,到而家正常地生活,唔係旁人可以理解既過程。
除左烹飪,我終於認真去做自己想做既事,就係婚禮司儀,印左卡片,開左FAN PAGE,都係唔想自己有藉口縮沙,幸好,其中有兩次只得自己一個人負責既婚宴亦順利完成,仲得到多少既讚賞,令我信心增加唔少;來年希望可以有更多工作機會,令哩個夢想,變成事實,再變成事業。
今年過年,我希望可以逗哂所有已婚既朋友既利是,哩個係未婚既最大好處;根據各位玄學大師既專業分析,羊年,我既運勢唔止係無上揚,仲要好努力先保持到平平穩穩,無驚無險,工作,人緣,桃花都好一般,都係要安分守己咁過;喂,即係點?即係咩都無講過,我一向做人都安分守己,無欲無求,就算有求,都係盡量靠自己,或者放棄未滿既欲求;唉,睇黎都係自求多福罷。
如果真係要求,我會求健康,求家宅,求人緣,我唔想再有親人離開,我想自己同親人都身體健康,我想盡量同人和平相處,最好有人可以做互相關心體諒照顧包容,哩類人唔使多,幾個就夠,不過都真係好難搵,我點對人,唔等於人地點對我,正如投資一樣,要先預左會蝕,唔好諗住實賺。
其他咩事業呀咩姻緣呀,唔求啦,大師話要安分守己嘛!哩D根本係奢求!點可以求呢?

預祝大家羊年順景，心想事成，身體健康:,笑口常開,恭喜恭喜。

日常雜想

紅事白事其實做法完全相同,
只係一邊開心一邊傷心,
游走於兩者之間,
我感覺到很可笑很可悲,
紅事少人參與不太緊要,
但白事無親友前來則很冷清,
近來睇蔡子強先生的<新君王論>一書,其中一篇寫前紐約市長朱利亞尼的一句格言:
[婚禮是錦上添花,不一定要參加;葬禮是雪中送炭,卻非去不可];
同樣是跟主家人擁抱,但白事中的主家人會比紅事的主家人更需要你的擁抱,緊緊嘅相擁,對他們是最好的即時安慰,讓他們心靈上感到一點支持。
人生中的生,老,病,死,有些人沒有老,已病,已死;
有些人沒有老,沒有病,已死,有些人老了,病了,已死;
只有生,死是每個人都會經歷,
出生時萬千寵愛,去世時又會否有親友送別?，
這是我們看不到的事,因為我們都已逝