當寂寞時...

當寂寞時,
當煩惱時,
你會選擇一個人.
還是找朋友,情人?
拿起電話,
打給情人,打給朋友;

最後,
還是一個人,
因為沒有情人,
也不便打擾朋友,
所以,
要習慣單獨一個,
因為
沒有誰會不問情由不求回報,
沒有誰能無時無刻隨時隨地,
給你找到前來相伴。

你有寂寞時可以隨時找他/她的人嗎?

斷掉所有後路的決定

要做一個決定,如果要成功,
就先要斷掉所有後路,
不要給自己回頭的機會,
那麼,
就只有一直向前,
因為,
已經回不去了。

當我決定離開時,
除了考慮到很多原因,
更想到自己會否一時心軟而回頭,
於是,
先想好所有留下的理由,
再分析一下,
值得不值得我回頭;
結果,全都比不上對離開的期待,
即使有的是感情。

估不到自己能夠那麼堅定,
可能真的累了,厭了,
原來,
聆聽清楚自己的心聲,
認真看待自己的需要,
正視自己的感覺後,
是什麼都動搖不到我的決定,
信心和勇氣,就這樣冒出來,
令語氣也淡定起來。

前路根本似有還無,
但仍是要出走,去找一找,去看一看;
人生,有時需要一點衝動,
才會有改變,才會更豐富,
離開,
絕不是為了回來。

真心覺得開心

尋晚,
o係買完餸趕住屋企煮飯同阿哥食,
因為佢等緊我,
當然已經8:30;
我見到前面有三個人影好熟口面,
哦,原來係你地,一睇就知係打完波,
我本來都諗下有咩同你地講,
不過,心諗已經我好趕時間,
你地慢,我快,
好快我就行到去你地身邊,
佢兩個首先見到我,
我無除headphone,同佢地hi兩下,
其中一個好似有野想同我講,口up up咁,
不過,我無理,hi完就轉頭直行返屋企樓下;
當時我個腦只係諗住返上樓後要煮咩先,
一定要9:00前食飯等等等。

等緊lift既時候,你都行到黎大堂,
我亦除左headphone,望向你,
你即刻問我:[做咩行咁快?],
我話:[我趕住返去煮飯,我細佬等緊我],
你再講:[唔開心就唔好煮啦,叫佢地自己搞掂!],
我:[下...唔開心?...咁唔好既,我都買左野...]
[咩唔好,叫佢地去買麥記咪得囉!]你即刻搶住講,
咁口岩有街坊同我打招呼,我答唔到你,
你都轉身入左lift喇,
而我先開始load下你頭先講緊咩。
....................................................................................................................
事情就係以上咁簡單普通,
但就引起我無限思潮;
至少覺得好想笑,
點解我行咁快?
你係咪覺得我要就返你地既腳步,同你邊行邊傾?
定係...你已經習慣左呢?
咁,點解你又會認為我唔開心?
就係因為我唔出聲唔傾計?
仲要叫我唔好煮飯?
你覺得我唔應該咁辛苦嗎?
我真係唔明點解,更加想問既係:
點解你咁關心我?或者係點解你'好似'好關心我咁?
到底係咪我諗多左呢?

老實講,真心覺得開心,
至少我覺得你係留意我,係關心我,
仲為我好,叫我唔使煮飯俾細佬食,
我真係估唔到你會咁講,
你一直唔贊成我要對屋企負上太多責任,
你話最緊要顧好自己既事情先,咁先係對屋企好,
我記得你有咁同我講過。
嗯...
其實,係咪我一向諗得你太冷血呢？

第8個月

第8個月,
媽咪你幾好嗎?
你好喜愛既張國榮原來已經走左10年,
哩幾日都不斷有關佢既報導同節目,今晚仲有個紀念演唱會,我邊睇邊諗起你,
你成日讚佢靚仔,天生一副孩子臉,個嘴好似女仔咁細,官仔骨骨,型起黎就成個占士甸咁,一副明星相,[真係'林'死女呀!!]哩句你講得最多!
你又話佢打扮得女性化時唱歌跳舞時,條腰扭得婀娜多姿,表情好嬌柔,
[真係迷死人!]哩句你又係成日講;
你話佢咁靚仔咁後生,又有成就,竟然自殺,[真係徙哂......]哩句你每次講都擰擰頭;
頭先電視一播到我地好熟悉好鐘意既歌,我同阿B就一齊唱,好似[側面],[MONICA]我仲叫佢跳埋舞!!你最鍾意睇阿B唱歌跳舞,笑佢扮得似,又CHOK哂樣咁,而當你讚完哥哥,就會摸住阿B塊面講:[不過我個仔都唔差,都好靚仔呀!]你每次講都一臉滿足;
媽咪呀,阿B而家跳得仲勁仲掂呀!頭先扭腰果下真係笑死我!!忍唔住一手打落佢個PAT!!
媽咪呀,多謝你成日黎我夢度探我,我每次都會叫自己要記住個夢,因為好珍貴;
媽咪呀,我地三個好好,識照顧自己,分擔家務,我煮野食仲叻左!好在以前成日走入廚房睇你煮餸,問長問短,幫下手咁,你總係對我講做女仔點都識入廚,就算唔係要嫁人煮俾老公食,都係煮俾自己食,唔通下下出街食咩?!我話知道知道,咁就搶住幫你醃肉炒菜。而家我整肉餅已經有你七八成水準喇!早幾日仲煲埋苦瓜咸菜黃豆排骨湯!係咪勁先?
媽咪呀,最近我o係度諗,假如要你好痛苦咁生存,倒不如俾你舒服地離開,雖然我真係非常唔捨得你,掛住你,諗起你總會流淚,個心好痛,但同樣地,要我睇住你不斷被打針,忍受身體既痛楚,瘦得可憐既模樣,而我又幫唔到你,亦係好痛苦既事;
即使我知你都唔捨得離開我地,但要我自私地想留住你,而要你再勉強支持下去,我會覺得自己好衰,要你繼續受苦,實在於心何忍。
媽咪呀,你記得多D探我之餘,仲要話我知你而家安好,你有無見到外公外婆同姨媽,
我想見到你笑,知道嗎?
媽咪呀,你記得我最後同你講咩嗎?我話下世我地要再做母女,不過由我做媽咪,換我照顧你,你要等我呀!記得呀!!當日你滴眼淚話我知你係聽到,你好感動,咁,就當約定,
我約左你喇!!
媽咪呀,我而家就係因為太想見你,好想訓多陣,所以我成日都唔知醒返工!!哈...遲早俾老細照肺喇!XD我知,你一定話:[你爛訓就爛訓啦,又賴落我度,我晚晚都叫你早D訓架,我都唔明,你成日話好眼訓,但唔知點解又總係磨到點幾兩點先去訓,第二朝我叫你幾次都唔起身.....],係係係...我知喇,早D訓嘛,我知道架喇。
媽咪呀,我地夢中見喇!! SEE YOU!!

愛與信

對你來說,

愛是包含了什麼?

是包容,忍耐,尊重,遷就,欣賞,信任?

在我來說,

要決定愛一個人,

最重要是信任。

兩個人在一起,

是要靠信任來相處,

沒有信任,只會日夜懷疑對方,

對方說的每一句話,也好像在說謊,

每一句個親暱的動作,也好像為了掩飾一些隱瞞著的事情,

每一樣的照顧關懷,也好像為了彌補背叛的罪疚;

最簡單的例子,如對方時常外出,便懷疑是有第三者,

對方工作達旦,便懷疑是去了吃喝玩樂;

這些事情是最普遍不過。

其實,如果雙方是互相信任,

以上的情況是不會出現的,

當我相信你的心是向著我的,

而你亦能給我信心的話,

你說什麼,做什麼,去哪裡,我也不會懷疑,

因為我相信你不會欺騙我,

而且,在愛的當中,不應該存在懷疑。

信任是需要時間去驗證,

也要靠愛去累積,

彼此有責任給予對方信心,

以維持更長久穩固的關係,

坦承相對,是不二法門,

希望大家也找到值得愛,值得信任,互相坦誠的人,

希望我也可以。

放棄

原來要爭取幸福係咁困難,
我放棄了,
以後有再多既男人,再好既男人,
都唔使介紹俾我,
我放棄了。

一次又一次,
點解我都仲未明白......嘿,
做咩都似乎係多餘,
老實講,人要面,樹要皮,
我都有感覺,我都會覺得好瘀好樣衰,
人地唔知仲以為我咁主動,咁唔知醜,好勇喎,
嘿......但有幾多人知我其實會好怪責自己咁唔深熟慮,咁衝動??
會好嬲自己咁唔理後果架??

我明白,我係無樣無身材唔識打扮著衫粗聲粗氣仲要好肥既中女,
所以無人問津,送上門都無人要,都好合理
我唔會亦唔敢怪責人,自己知自己事,
哩個世界係咁公平,
咁就算啦,
死左條心就一了百了;
就等我同工作,家務,街市,屋企一齊終老。

我講過,今次係最後一次,衰左我就唔再對任何人有幻想妄想,
塊面皮唔支持得幾耐,點都要留返幾份俾自己遮醜;
咁算啦,我唔知仲可以,或者仲應該做D咩去爭取,
都係放棄了。

一切,減左肥先再講野。

我拒絕了便不後悔

今日有人走來跟我說看到某君跟女友在一起,表現很甜蜜似的;

我說果然是真的,不知他們何時結婚呢,

對方笑說都是我的錯,當初為何拒絕人呢~

我聽後沒說什麼,只應道我只跟自己感覺做決定,哪有錯?

過後我在想,

真的是我錯過了嗎?

如果當初沒拒絕哪可能當新娘的會是我嗎?

但,我又真的想這樣嗎?

老實說,

我沒有一點後悔,

即使開出[結婚]這麼大的期票,

也不吸引,

反而是壓力,

他也許是合適的人,

但絕不是我想要的人。

時間過去,當我擦亮眼睛後發現,

他需要的是一個需要他的人,

那不會是我,

不可能走在一起的,

更枉論結婚。

因此,沒有後悔這回事。