日常雜想

紅事白事其實做法完全相同,
只係一邊開心一邊傷心,
游走於兩者之間,
我感覺到很可笑很可悲,
紅事少人參與不太緊要,
但白事無親友前來則很冷清,
近來睇蔡子強先生的<新君王論>一書,其中一篇寫前紐約市長朱利亞尼的一句格言:
[婚禮是錦上添花,不一定要參加;葬禮是雪中送炭,卻非去不可];
同樣是跟主家人擁抱,但白事中的主家人會比紅事的主家人更需要你的擁抱,緊緊嘅相擁,對他們是最好的即時安慰,讓他們心靈上感到一點支持。
人生中的生,老,病,死,有些人沒有老,已病,已死;
有些人沒有老,沒有病,已死,有些人老了,病了,已死;
只有生,死是每個人都會經歷,
出生時萬千寵愛,去世時又會否有親友送別?，
這是我們看不到的事,因為我們都已逝

日常雜想

古語有云:長兄為父,長嫂為母,
點解係長兄先可以為父,長姊唔可以為母?
後日係舅父既喪禮,我細佬話要諗下先決定去唔去,我話其實係需要出席囉,叫佢自己好好諗下請唔請假。
如果媽咪o係度,佢夠膽話諗下先咩?屋企已經無咩親戚,咁親既長輩過身,都要話諗下先?佢平時唔知醒射波,好多野做就拎年假放又點計呀?
請半晝佢話咁不如放全日,仲返下晝黎做咩?......咁佢想點?
係咪攞假去日本兩轉,去踢波乜乜乜就得,去送別一個自細睇到佢大既長輩就唔得??
媽咪,最好你去佢傾幾句,我真係好想爆柒佢!!

日常雜想

<一粒能得利嘅情懷>
憑住魯芬bb+李光洙既魅力,再加埋近乎講粗口一樣嘅歌聲,大家忽然對能得利再次關注;
哩隻糖喺我細個時算係中檔零食,唔算得平,媽咪唔會輕易買俾我(其實所有零食都係><),係要果期乖乖地或者默書高分先會買俾我,先會可以一個人獨佔一筒(因為有時要同細佬分享),所以每次可以得到一筒能得利嘅時候,我都會珍而重之咁盡量唔狂食,盡量有節制地慢慢食;
我曾經有研究過一粒能得利點先可以食到最耐,答案係:唔好咬,一直含!等粒糖慢慢溶,愈溶愈細粒,最後溶到好似塊薄片咁,哩個就係最襟食嘅方法!
時日如飛,今天在我手裡係一筒大裝嘅能得利,價值不過係$18.7.-,隨時都可以買到黎食;
之不過,我仍然懷念從前唔捨得得食,要好珍惜咁食嘅感覺,所以都係唔敢瘋狂地一次過食哂。
粒糖嘅味道,或者無以前咁好食lu~

日常雜想

<小小小分享>
每個人既出生都會附帶一樣使命,從前我唔知自己既使命係咩,
如今我終於了解清楚,我既使命就係要代替媽媽去照顧家人,關愛佢愛既人;有時會諗,如果我係男仔,又或者我唔係最大果個,咁我會變成點呢?
幸好聰明既爸媽安排左我係女仔,仲係排最大既果個,咁就可以將個使命交俾我;而我原來自小亦學習緊如何照顧別人和家庭,直到今時今日,就可以大派用場。
即使我做人做到好灰,返工返到好無癮,照鏡都唔想見到自己時,就會諗返起自己其實有個使命未完成,所以唔可以隨便死左去,哩個使命未完成前,條命都唔可以完全由我自己話事,要得到批准先可以了結,咁,自然唔想死住。
所以,大家都要搵到自己既使命,然後努力完成,直至上天正式接你走果時,先至好走。

舊同學既存在意思之一就係提醒你係個有過去有歷史既人,
對於有聊無聊既往事,o係他地面前只可以承認,然後被訕笑揶揄;
真又好,假又好,都已經成長了,唔重要了,總之信就係真,唔信就係吹水。
well,我係信既

日常雜想

<小小小分享之做父母嘅嘢>
有朋友問我想心唔心急結婚生仔,我答佢話唔急就係呃你嘅,
同學朋友同事一個兩個三個排住隊結婚,再排住隊生仔,我無可能唔恨;
結婚,就係做人老婆;生仔,就係做人阿媽;
咁其實我已經體會到做人阿媽嘅感受,因為我有個細10年既細佬,自小我都有份照顧佢,除左幫仲係BB既佢沖涼之外,其他照顧我都有份負責;可能因為咁,所以而家佢同我都幾FRD底,成日KAI埋一堆;
而家佢係成年人,有自己既生活同諗法,唔再係事事依賴我,問準我既小朋友,見到佢漸漸獨立(思想上),我竟然有種唔捨得既感覺!!
覺得佢唔再屬於我,即將慢慢走出我既照料,有佢自己既生活咁;
我同朋友講,哩種感覺正正就係為人父母既感受!!
見住自己一手湊大既兒女,大個哂,唔再受控,唔再依靠自己既果種失落感,
所以我話我反而唔急做媽媽,因為我已經算係有經驗,亦知我一定會緊張到痴線,同埋好難接受兒女長大後要離開自己;
婚結左可以離,BB生左就永遠係你既兒女,係永遠無辦法改變既事實,
所以,我同朋友講,結婚可以,生BB就真係要諗清楚。
朋友既回應係難怪我平時個人咁長氣,原來我思想上已經跳到去媽媽級!

[做父母嘅嘢,你識條鐵咩?!]我就咁回應佢

日常雜想

同一日(8/1/2015)嘅上晝,我仍然係一身求其嘅返工look:
貼身長袖衫,外加中長身鬆身裇衫(摺袖),黑色窄身彈性質料長褲,波鞋;戴眼睛,基本粉底+畫眉,頭髮束起;
而同一日嘅下晝,我就極速變身成哩個飲宴+司儀look:棗紅色背心束腰連身裙,中短身西裝褸,黑絲襪,2吋尖頭高踭鞋;戴左color con,晚宴化妝,頭髮無再束起;
坦白講,照鏡果下覺得自己變左另一個人,唔係講緊靚唔靚，而係造型化妝的確可以令人改頭換面,唔同左樣咁,上晝仲係大嬸look,下晝就飲宴look;咁大個人當然知咩場合就以咩打扮出現,哩個婚宴司儀look,都算幾好啩？因為全部都係自己搞掂,無專業襯衫同化妝嘅人幫手。
件西裝褸同連身裙都係3年前買,一直未試過配埋一齊著,喺連續5日嘅飲食控制下,總算著得落,唔會太肉酸,而且出乎意料地同場面嘅環境色調配合到,總算無失禮人前。

到今日返工,我又變返要求其look。
所以真係襯好樣,就要自拍留倩影!!

特別鳴謝李敏姐嘅唔專業嘅攝影技巧。

收回讚 ·  · 分享